Update Tag 2
Bericht 14.4.24
Nachere onruhige Nacht weg eusne „liebe“ Zemernochbere (danke am Fc Bade) semmer ca. am 7ni ufgstande zom am 8ti go Zmörgele. Met Helf vo de feine Schoggigipfeli semmer echli müed aber motiviert in Morge gstartet. Nochem Zmorge semmer schnell zrugg is Zemmer zum eus fürs erschte Training am 9i parat zmache. Eusi Lieblings Trainerin t Emma het eus es wunderbars Iiwerme zauberet. Nachem Iiwerme hemmer no flotti Passüebige und Toorschüss gmeischteret. Denne hemmer Freiziit gha, bes es denne zum Zmetagässe gange isch wos „ersch“ zom 3te mol Teigwahre geh het. Nachem leckere Pastaplausch, hemmer eus ready gmacht fürs negschte Training. Nach einehalb Stund bröötle ide Sunne hets Wasser uf eusere Stirn kochet. Dennoch hets weder mol en chorzi Uffröschig vom Theorie Unterricht geh (das zum Glück im Schatte). Während die einte ganz entspannt am Pool gläge send hets en heftigi Wasserschlacht geh (Jan vs Anina & Tamima , sie send alli glaub echli nass worde). Denn hets au scho bald weder Znacht geh. Wie mers sech chan dänke hets natürlech Pasta geh. Nach dem feine Ässe hämmer denn no loschtigi Team-Challanges gmacht ond jezt gots denn bald weder ab id heia.
Höt am Morge hämmer alli früeh osem Nest müesse, well mer eus am 7ni ofe Wäg a Gardasee gmacht händ. Nach dem eus d’Trainer öpe 1000 mol gseit händ, dasmer oms verrecke müend pönktlech si, semmers ä alli gsi (osser d’Trainer sälber natürli).
De semmer ä scho loscruiset ond händ eusi DJ-Skills zom beste geh. Alli händs super gfonde – nomme de Raffi esch ned sone Fan gsi. De hämmer es chlises Päusli igleit ond de Jan het eus Batzeli zom ofs WC go gsponseret, aber di hämmer ned brucht, well mer send wi di grösste Gangsters onde dore. Öpe 10 Minute vor eusere Akonft im schöne Lazise hämmer de ä mol no checkt wied Klimaalag im Büsli funktioniert, nochdems eus fast verbrötlet het.
Chum semmer usem Büsli usgstege, hämmer ä scho di erste bekannte Gsechter gseh – zerst hämmer si ned chönne heitue, aber plötzli hets Klick gmacht: de FC Bade esch ä do! (hämmer e riiiesse Schock gha)
Zwar hämmer e harzige Start gha, aber d’U13 Buebe send jetzt eusi Gspänli.
De hämmer aber zerst alli mol ofs Hüsli müesse – osser de Jan, de esch go pflödere.
Nocheme feine Zmettag hämmer eusi Zemmer bezoge, bevors de am 5i s’erst mol ofe Tschuttiplatz esch. S’Training esch cheibe asträngend gsi ond d’Temperature seichwarm. De Alessio, euses Team-Bebe het scho mol flissig güebt, bald werd er euse Trainer. Cool eschs Training emu glich gsi, Plätz wo so guet zwäg send kenne mer do z’Seenge gar ned. (trotzdem vell liebi an Musterplatz)
Nochem Training semmer vom velle seckle voll gschluchet gsi, aso semmer grad e Pool gumpet. Be dem Wätter döf meh of kei Fall vergässe trenke, zom Glöck hämmer neui personalisierti Guttere becho, danke Trainerteam, vorallem Debi!
Nochere chline Suechaktion hämmer eus denn euses Znacht wökli verdient gha. De Rest vom Obe hämmer de no gmüetlech usklinge loh, bes es de be Zite ab uf Bettehuse gange esch.
Aber Achtung: morn semmer weder ON FIRE!
